Angel & Thomas

2004年6月開始講，終於來到今日... 光頭仔結婚了~~!!

花車s
8:00 去到長沙灣，6: 45就要起身。早過返工 + "行"過見工。聯同油王於 8:07分到達，然後立即佈置花車。小猛獸變身~~~ Miffy 公仔 + 彩帶 + 車門花，係第一次呀。

等埋Matthew 到達，三架車終於到齊。我地好似見到賽車入pit 咁，圍埋去拿拿聲整埋D車門花。睇一睇… ES300 / RX300 / Spario，清一色豐田出品... 好Q。

出發
搞掂晒 & Load 晒D野上車後，攝影師叫我地: "俾D士氣，嗌下口號啦!"。諗來諗去都冇人作到出來，枉為Marketing 人s。求其啦! IDD 啦 :"致電中國 9毫9，接左新娘即刻走 。" 十幾個頂級無聊精呀!!! 無聊過後，新郎哥一聲: "出發"，正式展開今日的任務。

接新娘
首先要在同層搵九個利是封，不過我地反轉全層，連垃圾桶底同消防喉都搵埋，都只係得八個。姊妹團當然唔收貨啦，唯有自己 "銀" 一封有料的去湊夠九封。
K:"喂，呢個利是封唔係我地架喎!"
S: "喜! 呢封咪仲好過o個封!"

第二關，要開口去咬舊掛在晾衫叉上的生菜... 即係綵青啦! 要抬起重百五磅的肥獅去綵青?! 好彩兄弟團中不乏力士，三兩下手腳已經搞掂。成個門口 + 肥獅口都係青，夠晒好意頭啦!

第三關，Wasabi 金莎! "你地咁辛苦，一人一粒金莎啦! 食完要俾返張紙我地"。邊有咁好死呀? 一定有咋! 一打開，綠色的 filling,,, 結果走廊的垃圾桶食左好多粒... 哈! 道高一尺 魔高一丈。

第四關，用腳在冰水內夾九筒、九萬、九索。好彩佢地唔係將成副麻雀放晒落去咋，如果唔係肯定死得! 由我 / Jerry / 新郎哥上陣，起初有D涼，好舒服。不過夾多兩三次後,,, 凍! 再夾多兩三次，D寒氣簡直係由下而上，直插心臟。變態的! 你地平時玩開冰架?

第五關，咀。新郎哥要咀晒咁多個兄弟。喂! 酒過兩回 high high 地就話姐，你咁樣兜野咀埋o黎,,, 真係心都離一離。

第六關，冰封鎖匙。要用身體將冰塊溶掉，然後用鎖匙開門接新娘。正當大家諗緊辦法之際，油王二話不說，一啖就咬碎D冰... 勁。

儀式
之後是敬茶，父母長輩etc，呢part 唔關兄弟姊妹事，可以休息下了。搞掂晒後，就開始返男家，小猛獸正式成為新娘車了。由於責任重大，慢行 + 謹慎 200%。

飲茶
返到男家都係儀式野多，又係唔洗我地。去飲茶 lu，不過我只有45分鐘去食。短短的45分鐘就update 了大家近來搞咩，我好快手呀! 之後佢班友仔就又嘆報紙 又嘆雜誌,,, 我冇得嘆，因為:

回門
又係儀式野，我只係負責接送，連樓都冇上了。Angel 甚至著返普通衫，casual D都冇所謂啦。

行禮 @ 新世界中心
回門後就直接向行禮地點出發，原來新世界中心 G/F 有個地方係 for 人行禮的，每 round 20mins 一對接一對，都幾多人的。

準備緊的同時，阿Sam 話可以帶我地返GZ 飲飲食食，又問幾時 / 邊個去? Thomas 好奇走過來問:
T: "講緊咩?"
S: "呢D活動唔岩你 ga la，你入去結婚啦。"
然後... 大爆笑!!! 當然係講下笑啦，叫埋老婆去都得架~

正式入去行禮，大家由he he ha ha 變得壯嚴 + 認真。不過負責開門的我&拉叔，臨開門前都要都要玩下野:
R: "喂，開門利是"
T: "又俾? 俾左lor"
S: "我地冇收過喎"
T: ………
我地係靜靜地咁玩，冇驚動其他人。最後當然係冇開門利是啦。

經過全日最正經的十分鐘... 甚至係呢一世人最正經的十分鐘後，佢地正式結為夫婦了。呢一刻，我浮現了幾個片段:

- 佢地o岩o岩拍拖時，Thomas 在 GV樓下幫 Angel 截的士。2001
- 以前返學好近佢地屋企，有一次 break time，走在上去飲湯，暖晒 (當晚係10度)。2004
- 幾次同佢兩個去打 Wargame。2005

祝福你地~

星光大道
禮成。由新人帶頭，一行人經過星光大道行去文化中心。一邊行一邊有人望住，有D Parade feel喎。最搞笑係有兩個自由行的小妹妹走埋Angel 度要同佢影相。去到文化中心影完相後，就返去攞車了。

寶貴一課
我好肯定，上新世界停車場時係冇事的。不過一落停車場好明顯小猛獸有唔妥。轟轟聲，一定是爆胎了。油王在我後面為我護航，然後以最最最慢的車速爬去文化中心入 Pit。

聽就聽得多，真係親手做都係第一次。要多謝 Matthew 同 Jerry ，真係幫了我大忙。最好笑係個個著到 "行" 晒，竟然係度換胎?! 攝影師哥哥當然唔會放過呢D難得 o既情景。呢幾張相的對比度... 我好肯定超級強烈!!!

我都算好彩了，車房D師傅話如果距離長 D就會傷及 Ling 圈，再長 D的話連車軸都會傷埋。經過檢查後 Ling 圈冇問題，不過條胎就補唔返要買過一條，多謝 $750... 痛!!!

用機械槍上返實 D螺絲 & 放回士啤胎後，小猛獸又生猛返了。錢事少，呢一課真係寶貴，經驗值上升唔少。

程序:
1. 在車尾箱攞工具。包括千斤頂、士啤胎、六角匙。
2. 在車底搵條陣。陣 = 受力位，user manual 一定有講。所以車內一定要有 user manual、電筒、鏡 (好彩 Kelly有咋)。當然仲要有地圖啦。
3. 用千斤頂慢慢唧起架車。
4. 將士啤胎暫時放在千斤頂附近的車底，以免千斤頂有事時成架車下墜。
5. 用六角匙鬆螺絲，取出爆左胎的Ling 圈。你一定唔夠力，用腳踩都未必得，最好成個人企上去。
6. 取出的Ling 圈放返落車底。即係同士啤胎換位。
7. 將士啤胎換上去。再成個人企上去，反方向扭。
8. 收工，拿拿聲去車房補胎 & 上返實D 螺絲。
下次萬一要求救，可以 call 我。

酒樓
皇廷 @ 北京道一號 9 樓。全海景，好靚呀。唔怪得20樓的 Aqua 會咁貴啦，好想去...。酒樓的正副經理知道我係伴郎後，所有野都 contact 我。點酒、入廚房睇菜、rundown、收麻雀時間、event時間、調位、點圍數、簽名... 全部都做晒。好彩有Jerry 全程協助，其實佢仲清楚過我... 佢係Thomas 細佬嘛。

Long Time No See (以年計)
Kelly
以前隔離team 個秘書，和記時代中期都玩得幾癲的。不過佢遇著個衰老細… 一年多D就頂唔順走了。好奇怪地，好多次放工時間去銅鑼灣都會撞到佢… 好Q。

Fion
和記時代後期的AA。其實佢個人幾好呀，又肯幫人又唔擺款又唔黑面，但係唔知點解好多人唔妥佢架喎?人夾人掛。

Sisse
我舊阿姐。基本上佢係睇住我大，睇住我壞。佢一到酒樓，就急不及待要來一個擁抱。喂，阿姐! 洗唔洗攬咁實呀? 真係咁掛住我? 不過佢今晚抱恙唔飲得酒... 差左D野咁。

阿健
原來佢係Angel 個舊同事。今日唔飲，只係上來坐下 & 影相，因為佢全場只係識 Do Re Me = Thomas / Angel / 我... 怕悶喎。

Jason Ng
我舊老細。Emm... 從前氣氛冇變，我同佢都係一句起幾句止。

Eddie Lao
當年經常打online game 的機友。

Heidi + 大頭
GV年代的同事。

出場
超 Creative 動畫 + 美麗之最。佢將自己的名句 "一條溝唔到女既可憐蟲"& 佢同 Angel 的故事製作成一條短片。"有頭髮變冇頭髮"、"去旅行"、"湯馬斯王子與雪兒公主"... 呢條死仔 tum 女仔係有一手的。短片結局 & 臨出場前的音樂是美麗之最… "想一生看下去，還會等一天八十歲"。我望一望佢兩個，舉起了母指。

感動位
1. Saxophone "遇見"
原來條友仔識吹 Saxophone的，當然冇楷哥咁犀利啦。不過仍然吹得一首 "遇見"。佢話同Angel 以前係同一間學校的，不過從未遇過。和記年代又唔同 dept & office 都可以遇見... 明顯就係上天已經安排好。

2. 獻花 "每一個明天"
Thomas 事前訂了二百幾支向日葵，不過要秘密進行。兄弟姊妹團要在五分鐘之內派出D花俾賓客，再由賓客上台送俾 Angel。一邊獻花，Thomas 就一邊唱 "每一個明天"。呢個感動位，強呀! Angel 當然頂唔住，喊了出來。

倒戈
"你送完客啦嘛? 送完就得了。"
"埋單先，然後乖乖地返上台同我地飲過。"

事緣: 敬酒時竟然冇人隊佢? 做兄弟唔洗擋酒? 結婚的一天滴酒不沾?
兄弟團: 唔得! 點可以咁架?

玩還玩，我地都有個限度既。十個人飲左六支紅酒左右之嘛，一人半支多D，唔係好多姐。

散場了
先送 Fion 上的士，然後與 Kelly 同車。哈哈哈~ 超近呀... 不過返到去已經散散地。立即沖涼訓覺，完成了長達18小時的任務。

淨二
如果女仔做多過三次伴娘就會嫁唔出... 伴郎有冇關係呢? 如果有，咪即係剩返兩次??