自護軍北伐

Assemble
原先約定在總站等，點知各有各忙，四人分別在三個車站上車，第7卡第1道門，講了好幾次呢。架火車唔知係咪冷氣壞了，全程都好熱!!

Gate
我呢個港燦甚少返大陸，上次已是半年前了，e道還是第一次用呢! 幾得意 & 好方便，難怪入境處減少請人。

Compass
過關後便正式展開今次的戰事，首先由上尉帶路去基地。條友仔好似唔多識路咁，叫佢買地圖又唔買，仲話有GPS。唔... 放過你! 反正全程將會搭的士。

Base
富臨大酒店，屬五星級的，環境算幾好，只是大堂較暗。取匙前，軍士長已經發現某處有D野，準備拔刀。我就叫佢先落腳，再從長計議。上到房我先敲門，然後再把門長開一會，再把窗簾拉開... 你話我八卦都好啦，儀式做完心安理得。安頓下來後，進行會議，訂下了今日的作戰路線，又講出了各人的子彈數量。

Cruise
沿酒店旁的大街一直走到一個大型商場，途經一些燈紅酒綠的地區。阿嬸走過o黎問: "要唔要小姐呀?" 我地當然沒有理會，繼續行。又難怪o既，我地一行四人，全部男人... 走到了一個大型的十字路口，軍士長與上尉已經 over heat 了，於是就走進一個大型商場休息一下。唔入由自可，一入去... 氣溫比外面更熱!!! 眼見軍士長與上尉快要支持不住之際，我決定向上層走，或者有好地方呢! 果然冇錯，我地勁食雪糕，食左半個鍾左右先至肯走，搞到下士好悶。

Meal One
大鑊呀! 以東北菜色為主題的餐廳... 叫了燒羊架、驢肉餃子、燒餅 etc。好快就被我地呢班食肉蝗蟲消滅了!!! 好味呀 + 好平呀! 每位 $40都唔洗!!!

Mission One
飽暖思.. (自己諗啦)。星期五與 Sammie 食 lunch時，她介紹了嘉年華會給我，話幾好，勝在又平又多野玩。先到芬蘭浴 part，有冷熱水池，有蒸氣浴。我地班無聊仔又在冇咩野好玩 o既情況之下搵D野玩了 – 猜輸左跳入凍水池! 我... 反正都想試一試，於是未開始猜就身先士卒! 嘩!!! 先熱後冷、一冷一熱... 攞命呀! 玩完一輪後上了休息室睇利物浦，有問: "先生洗唔洗練腳呀?"千其唔好!!!上次係廣州試過後真係怕怕了。 睇完波，就去 dup 骨，呢個阿姐手勢一流，力度適中... 犀利，tips 俾多D 都係抵的! 之後打左陣乒乓波，2 對 2 時 ok好玩，明顯地上尉與下士係唔識打的，只有我同軍士長有得砍下。雙人賽後就 o黎單打獨鬥，原來軍士長同我大家實力不相上下，結果我憑較穩定的發揮，以11比8險勝。真係好玩，最緊要有對手! 後期知道上尉心心不憤... 算啦，玩下姐，又冇獎 o既。

Meal Two
被的士阿叔老點下，去不到指定的餐廳。又由於各人腹鳴如鼓 + 烈日當空，於是就求其衝入一家叫 "腸粉王" 的餐廳醫肚。又係好平!!! 每位 $23，食到飽一飽。

Mission Two
搭了百幾蚊的士，老遠走到沙井鎮，就是為了玩小型賽車。最緊要有對手 part 2 ，我同軍士長都是愛車又鍾意玩車的人，在賽道上你追我逐，一時你過我，一時我過你，好正呀! 可惜佢一次小意外，就再見唔到佢蹤影了。至於上尉與下士係唔多識玩的，算啦，玩下姐，又冇獎 o既。不過佢硬係要越級挑戰的話，冇辦法啦! 唯有俾 D顏色佢睇: Lap 左佢之後再擺出母指向下的挑釁手勢。即時將佢的自信摧毀，同時又引爆了他的決心。經此一役，上尉打算學車呢! 這個場地還可以，期待下次與原班人馬 + Jason + Eddie 再來!

Return
玩夠了 & 時候不早了，場地安排了白牌車送我地去皇崗。原來過皇崗係舒服過過羅糊好多! 行三號幹線，只是用了半小時左右，就返到屋企了。